.png)
📅 Hoxe, martes 29 de novembro, teñen lugar ás eleccións ó Consello Escolar.
🕕 Pola tarde, dende ás 18:00h ata ás 20:00h
estará aberta a mesa de nais/pais/ responsables do alumnado para que
poidades votar.
.png)
👉 As candidatas son:
Karen Irina Wernink Vallejo
Belén García Malvar Suárez
Paula Tenreiro Allegue
Animádevos e pasade polo centro para deixar a vosa papeleta e escoller unha das persoas que nos vai representar en Consello Escolar.
CONTAMOS COA VOSA PARTICIPACIÓN!!!! MOITAS GRAZAS😊
.png)
Sempre é sorprendente que volve ser xa 25 de novembro. Sorprendente polo rápido que pasa o tempo, e sorprendente pola consideración de que un ano máis aínda estamos moi atrás na solución dun problema de enunciado sinxelo, resposta clara e solución altamente complexa.
A violencia de xénero é unha contaminación incontrolada do noso sistema de convivencia. Un lixo interno que provén da pervivencia dunha situación de privilexio dunhas persoas contra outras. Un privilexio que tenta manterse con unllas e dentes para evitar mirar de fronte á igualdade e á convivencia pacífica, cuxo primeiro chanzo debera estar nos fogares e nas relacións persoais, entre homes e mulleres neste caso.
A nós tócanos defender a solución educativa a estes problemas, pero novamente temos que dicir que falar de educación non é falar de centros escolares, é falar de sociedade, de todos os poderes públicos, de competencias máis que compartidas porque aquí ninguén pode dicir que non lle toca traballar de primeira. Educar quere dicir non permitir as constantes mensaxes que esta sociedade hipócrita está dando sobre a utilización da muller, sobre a súa secundariedade na vida familiar, sobre a sobrecarga que permitimos nelas no coidado das demais, sobre a renuncia constante a traballar colectivamente por un mundo diferente; no que ser home ou ser muller queden nunha esfera privada que non interfira no laboral, no económico, no social, para que todo iso non volva a lixar o persoal, o humano.
Dicir NON á violencia de xénero é dicir NON a un modelo educativo como o que temos. É dicir NON a pensar que o importante en educación son as ciencias, as matemáticas ou as linguas. Dicir NON é dicir que hai que educar persoas amábeis, cariñosas, capaces de convivir en paz, de debatir en harmonía e de colaborar sempre coas demais no debullado dun mundo diferente. Ese no que as nosas fillas poidan confiar como base social do seu futuro que é exactamente o que desexamos todas as nais e pais do mundo.
.png)
Un ano mais desde o IES vaise por en marcha a elaboración do
terceiro título da Colección Sar, logo de ter editado en cursos
anteriores Confinamentos e Abre alas!
A idea inicial é traballar este ano a DIVERSIDADE.
Vivimos
nunha sociedade diversa. Unha sociedade na que conviven (non sempre sen
problemas) varias culturas, diferentes linguas, distintas orientacións
sexuais, múltiples sensibilidades e ideoloxías variadas. A pluralidade
é, sen dúbida, unha inmensa fonte de riqueza.
O IES de Sar, reflexo exacto da sociedade actual, é un centro diverso. Temos estudantes que proceden de diferentes países, que se expresan en distintas linguas, con orientacións sexuais diversas, con múltiples sensibilidades… Somos unha comunidade educativa plural, heteroxénea, plenamente consciente de que o discurso social e o progreso deben ser construídos entre todas. Traballamos para que a sociedade do futuro sexa máis aberta, máis receptiva, máis comprensiva e estea máis cohesionada. Moitos dos estudantes do IES de Sar afirman orgullosos que chegar a un centro onde se respectan as diferenzas, onde non se xulga o que é distinto, onde se alenta a creatividade individual, fixo que se sentisen cómodos e que se expresasen con liberdade. No noso centro, a inclusión non é un discurso teórico, é unha realidade. Unha realidade da que nos sentimos orgullosos.
É por iso que, un
curso máis, tentaremos dar ao prelo un libro que recolla os traballos,
as inquedanzas, as sensibilidades dun grupo plural e creativo. Un
colectivo orgulloso de ser como é, integrado por estudantes, docentes e
familias que conviven nesta comunidade educativa co convencemento de que
o futuro se mellora sementando no presente e que só cooperando se
conseguen os maiores retos individuais.
A
idea é implicar ao alumnado, profesores e familias, animándose a
participar con textos (prosa, poesía, teatro, ensaio...) escritos en
calquera das linguas estudadas no centro (galego, castelán, inglés,
francés ou portugués), ou mesmo en calquera das linguas nativas do noso
alumnado, sempre que acheguen tradución dos seus textos. A extensión mínima das colaboracións é de 15 liñas e máxima de 3 páxinas.
Dende
o centro van implicar nesta iniciativa o fotógrafo compostelán Fuco
Reyes, quen está disposto a traballar nun novo proxecto co noso alumnado
para elaborar diversos materiais fotográficos que logo sirvan para
ilustrar o libro.
Podedes ver unha
selección de fotografías do último proxecto que realizou no noso centro o
pasado ano neste enlace:
https://fucoreyes.es/project/la-escoria-rebelde/
Se finalmente hai moito material, habería que facer una escolla para publicar o que teña maior calidade. A idea é ter editado o terceiro título da Colección Sar a finais de curso.
📝 Enviar as vosas achegas a estes dous correos electrónicos antes do 30 de marzo:
👇
Patricia Arias Chachero - Equipo de Dinamización Lingüística
sar.patriciaarias@iesdesar.org
Baldo Ramos - Vicedirección
sar.baldoramos@iesdesar.org
ANIMÁDEVOS A PARTICIPAR!!!!!
Na nosa Lei educativa fundamental, logo da modificación do ano 2020, inclúese o "cumprimento efectivo dos dereitos da infancia segundo establecido na Convención sobre os Dereitos do Neno de 1989", como o primeiro dos principios inspiradores do noso sistema educativo.
Resulta sorprendente que este principio se incorpore en 2020 á normativa, e que se indique nel que se recoñece "o interese superior do menor, o seu dereito á educación, e a obriga do Estado de asegurar os seus dereitos". Resulta sorprendente porque probabelmente a práctica totalidade das persoas adultas que estamos hoxe aquí, e a absouta totalidade das que nos gobernan, pensarán que xa estabamos "tendo conta da xente moza e da infancia". Ese ven sendo o gran problema que temos hoxe en día cos grandes retos educativos, coa atención efectiva ás persoas que están no sistema, coa inclusión, coa igualdade, coa participación do alumnado nos centros públicos, co respecto que lles adebedamos como adultas, familias, docentes e administración.
Os dereitos da infancia son dereitos certos, reais e contrastábeis. Non serve que fagamos as cousas "polo seu ben", temos que facelas xuntamente con elas, acompañándoas no seu proceso de crecemento dende a perspectiva da consideración da súa realidade e da súa -moito máis grande do que recoñecemos- capacidade de incorporarse a un mundo no que tamén viven, senten e aturan as persoas adultas coas que lles tocou convivir.
Un neno, unha nena, non son nin unha adulta en miniatura nin un proxecto de adulta nin un xermolo en formación porque iso sómolo todas durante toda a vida. Son realidades concretas que están desenvolvéndose ao noso carón e teremos que tratalas como tales. Sen condescendencia e con respecto. Sobre todo con moitísimo respecto.
.png)
O Consello Escolar é o órgano de participación no centro de diferentes sectores da Comunidade Educativa. A súa composición, é a seguinte:
Director/a do centro
Secretaria/o (con voz pero sen voto)
7 profesoras/es elixidos polo Claustro
3 nais/pais de alumnas/os (1 deles proposto pola ANPA - que coincide coa Presidencia da ANPA - e as outras 2 elexidas por votación)
4 representantes do alumnado
1 representante do Concello
1 representante da administración de servizos
Os membros do Consello Escolar son elixidos por 4 anos e renóvanse parcialmente cada 2 anos. Neste curso compre facer unha renovación e de acordo coa lexislación vixente, no sector nais/pais do alumnado, corresponde renovar 1 nai/pai.
Para elección de representantes de nais/pais de alumnos/as hai que ter en conta:
ELECTORES: Son o pai e a nai ou os titores legais (poden votar os dous) dos alumnos/as matriculados no centro que configuren o censo de pais/nais exposto no taboleiro do centro (convén revisar e comunicar se hai erros de omisión ou transcrición). Se non figurase no Censo ou advertira algún erro debe poñelo en coñecemento do centro
ELIXIBLES: Todos os electores son elixibles sempre e cando presenten a súa candidatura. Se queredes ser candidaatos/as hai que cubrir o impreso correspondente que enviamos anexo,está a vosa disposición na web do centro centro.
📅 O prazo de presentación de candidaturas será do 11 ao 18 de novembro (ámbolos dous inclusive) en horario de 9:00h a 14:00h nas oficinas do centro.
Pódese descargar o impreso desde aquí e entregar cuberto e asinado na secretaría do centro.
📜 A votación para
elección de nais/pais que corresponde renovar farase entre as
candidatas e candidatos presentados, admitidos e proclamados pola Xunta Electoral o
vindeiro 29 de novembro no IES de Sar (pendente de confirmar a hora)
📢 Recordamos
a importancia que ten este Órgano de Goberno á hora de tomar decisións
que afectan ao centro polo que deben estar cubertas todas as prazas. É
de suma importancia que se presenten o maior número de nais e pais do
alumnado para poder garantir a pluralidade de representación e poder contribuír a un mellor funcinamento do centro.
O xoves 3 de novembro, grazas a colaboración da nosa Comunidade educativa do IES de Sar, comprobamos co noso alumnado que é posíbel vivir da arte e como viven ese día a día diferentes creadores moi destacados das disciplinas artísticas ás que pertencen.
Podedes ver tamén o que saíu en prensa no seguinte enlace 👇
https://www.elcorreogallego.es/santiago/encuentros-de-tu-a-tu-con-artistas-de-renombre-DO12490276
Con motivo da celebración dos 10 anos da estrea de O Apóstolo podes ver a película gratis e en aberto na web!!! www.oapostolo.com .
Ademais na páxina de Youtube, Fernando Cortizo estará a subir materiais inéditos ao longo destas próximas semanas. Que mellor plan para Halloween?
Multipremiada a nivel internacional, preseleccionada aos Oscars e nomeada aos Goya, foi a primeira película de animación stop-motion estereoscópico realizada en europa. Unha longametraxe de misterio e fantasía ambientado no Camiño de Santiago
Grazas a colaboración do IES de Sar imos celebrar no centro a I XORNADA DE ARTES dirixida a todo o alumnado. Nestas xornadas contaremos con creadores de diferentes disciplinas artísticas para compartir con nós as súas experiencias creativas e laborais; desde as Tanxugueiras e o cineasta Luís Avilés ata o estereógrafo Luis Rosales, o debuxante de cómic Tomás Guerrero e a tatuadora Joa González / INK Factory.
O xoves día 3 de novembro viviremos no IES de Sar unha xornada moi especial.
Sabemos que é un reto organizar unha actividade para todo o noso alumnado, pero estamos seguras de que vai estar á altura para demostrarnos, tanto ao claustro do centro como á ANPA, que é posíbel traballar pola cultura nos institutos coa complicidade e a responsabilidade do noso alumnado.
Subvencionada por:
