EDUCAR EN IGUALDADE É EDUCAR EN LIBERDADE

 

Cada 8 de marzo alzamos a voz para reivindicar un mundo máis xusto, libre e igualitario. E se hai un piar fundamental para construír ese futuro, ese é a educación. Porque a escola non só transmite coñecementos, tamén axuda a moldear valores, actitudes e formas de entender o mundo. Por iso, queremos unha educación feminista: unha educación que forme persoas libres, críticas e iguais.

Educar en igualdade non é unha opción, é unha necesidade. Non podemos permitir que os estereotipos de xénero sigan limitando os soños das nosas fillas e fillos. Que se siga dicindo que hai profesións “de mozos” e “de mozas”, que os coidados recaen só nunhas mans e o liderado noutras. A educación ten que abrir portas, non pechalas. Ten que ensinar a cuestionar a desigualdade, a detectar a discriminación e a combatela.

Queremos aulas onde se fale de referentes femininos en todas as áreas, onde as nenas se sentan capaces de ser científicas, artistas, enxeñeiras ou o que elas decidan. Queremos patios sen barreiras, onde o espazo non se reparta en función do xénero. Queremos libros de texto que conten a historia completa, sen esquecer ás mulleres que cambiaron o mundo. Queremos unha educación afectivo-sexual que ensine o respecto, o consentimento e o dereito para vivir sen medo. Queremos que a coeducación sexa unha realidade en cada centro escolar.

Porque educar en igualdade é educar en liberdade. É formar a persoas que poidan ser quen realmente queiran ser, sen que o xénero marque as súas posibilidades. E esa responsabilidade é de toda a sociedade: das familias, do profesorado, das institucións e de cada unha de nós.

Este 8M seguimos esixindo un compromiso firme cunha educación feminista que garanta un futuro sen discriminación. Porque a igualdade non se aprende soa: ensínase, deféndese e conquístase.